港大港永續

中秋節就啱啱過咗，月餅款式愈黎愈多，大部分嘅月餅廣告都打住「香港製造」嘅旗號。製作就係香港製作，但材料呢？ 要係香港搵到 #香港種植 嘅原材料談何容易，選擇不多，成本高，令很多廠商都卻步。由HKU-CCSG 推動成立的香港品牌「本地種植」首次推出月餅，出盡力氣搜羅本地種植嘅原材料。佢地為製造出嚟嘅月餅做咗個統計， 以材料重量計算，直接來自本地農場既材料佔20%、另有25%嘅材料來自本地廠房/ 老字號的製品。雖然本地原材料的成份仲未做到過半，但由月餅嘅製作過程、包裝盒嘅設計加埋印刷等都盡力做到 「香港製造」。 香港的食品供應依賴外地進口，進口食品佔整體食品供應的九成，因貨物運輸產生嘅碳排放十分高，本地生產蔬菜供應的比率佔全港不夠百分之二。有研究指香港的人均碳排放量，高達29公噸，遠高於全球人均碳排放量的6.5公噸。選擇本地生產嘅原材料和食品，可以大大減低運輸過程的碳排放，仲可以支持本地農業發展，穩定本地食物供應；維持社區更多元嘅經濟模式，增加本地就業機會。 想支持本地製造本地種植嘅農產品？記得follow LoCoFARMS 本地種植 嘅社交平台，留意佢哋推出嘅產品喇!

上回同大家分享咗企業永續風險披露框架「自然相關財務披露工作組」（TNFD）如何突顯國際間對生物多樣性呢個議題嘅重視﹐同埋加強咗企業喺呢方面嘅責任。上年2022年尾舉行嘅聯合國「#生物多樣性大會」COP15﹐亦都促成咗一個被喻為同《巴黎協議》有著同等意義嘅里程碑。大家可以睇圖了解「昆明-蒙特利爾全球生物多樣性框架」入面幾個突破性嘅重點。 香港政府2016年亦有首次發佈《#生物多樣性策略及行動計劃》﹐制定2016至2021年加強保育生物多樣性、支持本港嘅可持續發展﹐香港嘅商界都有積極參與。當時香港總商會仲作出正面回應﹐表達重視生物多樣性嘅保育﹐以及提出商界係推動呢方面進程嘅重要持份者之一。 商會列出數個重點表達企業如何參與﹐包括加強企業﹐尤其係中小企對生物多樣性有關嘅知識及潛在風險嘅認知﹐企業對相關風險嘅意識會主導佢哋嘅決策以及對未來發展嘅規劃。另外﹐亦期望政府能夠加強唔同部門嘅溝通﹐等相關新政策出台時能夠集合唔同界別嘅考量﹐制定出更全面嘅政策方向俾業界跟從。 睇番最近政府發表新一年度嘅財政預算案﹐當中都有提及政府有意發展 #綠色金融，為各項環保項目募集更多資金﹐不過環保團體就表示呢啲舉措需要配合相應監管措施﹐以減少「漂綠」嘅機會。例如機管局就擴建第三條跑道發行綠債，被綠色金融嘅國際環保組織Reclaim Finance發聲明質疑項目將破壞生物多樣性及破壞環境，係有潛在「漂綠」嘅風險。(咩係 #漂綠: https://bit.ly/43FhAhO) 此外，財政預算案亦提到，政府已就建造一千公頃嘅交椅洲人工島填海範圍、土地用途、交通基建、財務安排等提出初步建議，並展開公眾參與。但面對龐大填海造地計劃，絕對有可能對水質、生態同埋漁業造成不可逆轉嘅破壞。我地喺唔喺需要有更長遠嘅海洋空間規劃，以實現城市發展、民生保障和生態保育並存呢？作為其中一個持份者，唔知大家又點睇當中嘅機遇同風險？

成日聽到政府為咗減少對環境嘅破壞，規管企業同個人嘅行為，向佢哋收取返污染所產生嘅成本，但你有冇諗過喺公司內部都可以做到類似嘅機制呢？ 喺氣候變化下，各國所訂立嘅 #碳中和 目標都令減碳成為焦點。近年來，越嚟越多公司開始將內部唔同嘅部門設定為管制對象，向佢哋收取碳排放費用，亦即係 #內部碳定價（Internal Carbon Pricing）。 內部碳定價同好多其他環保徵費一樣，都係採用咗 #污者自付 嘅原則，主要目標喺將減碳誘因傳遞到公司內部每一個部門、每一個員工身上，讓公司內部不同階層嘅同事都更了解到所做嘅商業決定對環境產生嘅影響。簡而言之，就係希望透過經濟誘因，促使公司減少同管理碳排放，同時亦都可以推動創新，研發更低碳嘅生產流程、內部供應鏈等，幫助企業邁向綠色轉型。 內部碳定價都分咗幾種形式，而最常見嘅就係「#影子碳價」（Shadow Price）同「#內部碳費」（Internal Carbon Price）。前者係公司就佢哋嘅投資喺未來所造成嘅碳排放作出碳定價估值，主要係作為內部參考，幫助企業量化評估不同方案嘅環境效益，推動低碳決策。至於「內部碳費」就係向公司內部唔同部門或者業務單位收取佢哋喺營運所排放溫室氣體嘅碳費，以經濟誘因激勵各個部門或業務單位採取減排措施。 呢個做法喺商界都越嚟越普遍，根據國際CDP組織 (前身為Carbon Disclosure Project，碳披露計劃) 喺2021年嘅報告，全球已經有超過 800家企業實施內部碳定價，同時亦都有 1,159 家企業話會喺兩年內推行。推行呢個措施嘅公司都不乏一啲大型跨國企業，包括 #微軟 就早喺2012年實施「內部碳費」，收費範圍包括公司直接排放，喺2019年仲擴大到企業價值鏈！佢哋仲會將收集到嘅費用投資喺提升能源效率、碳抵銷、購買綠色能源等，進一步推動減碳。而跨國消費品公司 #聯合利華 亦都會用「影子碳價」為總投資超過100萬歐元嘅項目進行碳價估值。至於香港，都有公司開始留意到內部碳定價嘅趨勢！#太古集團 喺今年都試行咗內部碳定價，包括向佢哋旗下嘅公司收取「內部碳費」，並將資金重新投資到減碳嘅業務上。而「影子碳價」都會適用於太古未來嘅重要投資項目。#煤氣公司 亦都話正在研究同計劃分階段實施內部碳定價。 其實喺減碳嘅大環境下，內部碳定價唔單止為環境出一分力，更加有助企業準確評估同有效管理佢哋嘅溫室氣體排放量，減低公司嘅過渡風險 (Transition Risk)，為未來可能實施嘅碳稅、碳徵費等環境政策做好準備，建立企業碳風險嘅管理能力同應對氣候變化嘅業務抗禦力，提升企業長遠競爭力！

隨住永續發展成為當今嘅熱門趨勢，各大企業都開始投放資源，為積極做好永續風險管理各出奇謀﹐不過實際成效不時存疑﹐因此漂綠（Greenwashing） 一詞就係嚟形容企業將自己嘅經營情況、產品或者服務包裝到比實際情況更永續﹐透過未經證實、誇大，甚至乎虛假信息去營銷所謂嘅環境效益。而企業當然除咗環境效益（E），都可以誇大佢哋對社會（S）嘅貢獻（Social washing）。 什麼是Greenwashing: https://bit.ly/greenwashingwhatisit 為咗打擊Greenwashing呢種混水摸魚嘅行為，歐盟係今年三月宣布新法案﹐規定企業嘅永續聲明需要由獨立機構驗證及進行監管﹐違規嘅話就會引嚟法律責任及懲罰。喺新局面下，好多企業對於有機會被矇上漂綠罪名都聞風喪膽﹐所以就出現咗一個新詞 #Greenhushing 去形容企業都寧願講少啲都好過講錯﹐以避免被公開審查、指控、索賠，佢哋會變得謹慎並且有可能會選擇隱藏呢方面嘅努力。 當然企業謹慎啲係好事﹐不過小編就覺得無論係Greenwashing抑或Greenhushing，都可能對推動企業永續轉型造成反效果。不論係分享失實嘅資訊甚至係唔分享資訊，對消費者而言都會影響咗消費嘅透明度﹐令消費者更難去選擇環保嘅產品﹐或者了解到佢地消費呢個舉動對環境帶嚟乜野影響從而更理性地消費。 而對整個行業嚟講﹐企業分享永續數據、知識或成就都可以帶動良性嘅競爭﹐就好似 #屈臣氏蒸餾水 於2015年成為首間使用100%再造塑膠為樽身物料嘅公司﹐呢個消息發佈以及當中嘅知識分享都帶動到其他行內競爭對手去考慮轉用更環保嘅物料﹐透過整個行業嘅變革先可以為回收塑膠製造一個有利可圖嘅市場﹐實踐 #循環經濟。 而解決Greenhushing方法可以由營銷者做起﹐讓佢哋得到更全面嘅永續知識培訓，以便佢地明白不同永續發展術語之間嘅概念，並且配合專業嘅機構進行全面嘅數據收集及求證先至作公開分享﹐呢啲都係其中一啲方法避免漂綠。 唔知大家又有無其他建議可以避免漂綠呢？

家居風水佈局就成日聽到，但對於以前鄉村居民而言，佢哋就要依照環山抱水佈局建村！村民相信喺村後保留樹林會帶來好風水，稱之為「風水林」。#風水林 (Fung Shui Wood) 喺華南地區特有嘅人文景觀，通常呈月牙形環抱民居田野，作為村落嘅天然屏障。風水林的林木部分是天然生長，亦有村民種植嘅品種。 風水學說中最忌諱伐樹，認為巨樹有靈會保佑村落，樹木生長旺盛會帶旺村落嘅發展。樹林在村民的庇護下年復年地生長，形成了成熟而物種豐富嘅樹林，為野生動物提供優質嘅棲息地同飯堂。而且有啲低地嘅樹品種，因為生境受破壞而越嚟越少見，但都喺風水林被完好保存。所以風水林有好高嘅生態價值！ 風水林真的能聚財擋煞？原來亦有科學解釋。地理層面而言，樹木會防止水土流失、預防山泥傾瀉。經濟方面，風水林更提供咗天然資源畀村民日常所用，包括有經濟價值嘅果樹，如荔枝、龍眼、大樹菠蘿等；有入藥治病嘅品種，如毛果算盤子、九節、火炭母；同埋製作家具嘅木材，如五月茶、鵝掌柴等。風水林更有調節微氣候功能，炎夏時可降低村落嘅溫度，寒冬時又可以緩和北風。 森林村落︰梅子林及蛤塘永續鄉村計劃 嘅梅子林、蛤塘村後都屹立著茂盛嘅風水林，遊覽時記得唔好錯過呢個特色嘅景點！ 參考資料： 1. 葉國樑、魏遠娥、葉彥、廖家業、黎存志 (2004)。《風水林》。郊野公園之友會、漁農自然護理署及天地圖書有限公司。香港。

近年講氣候變化，成日都提到地球生態系統已經到咗臨界點，專家呼籲社會各界都要實際行動帶來改變，但係你有無諗過應對氣候變化舉措如果成熟程度都去到一個「臨界點」的話﹐咁會有咩突破性發展呢？ 一月喺瑞士達沃斯舉行嘅2023世界經濟論壇上，一份由可持續發展咨詢公司Systemiq和英國埃克塞特大學聯合發佈嘅報告就提出三個應對氣候問題方案嘅「超級臨界點」（Super-tipping point）﹐一旦觸發到的話﹐將會更迅速實現零排放嘅效果！咁呢啲舉措嘅臨界點係點樣先會出現呢？就係當零碳嘅方案變得愈來愈成熟﹐令到其成本低過高碳排放嘅方案嘅時候﹐按照市場上符合經濟效益嘅定律就會自然吸引更多人會採用零碳嘅方案﹐從而投入到更多資源優化﹐帶來幾何級嘅進展。 報告分享咗3項舉措可以透過政府政策嘅帶動去達到迅速實現嘅效果。但參考還參考，小編唔建議照單全收咖~  推動電動車 - 可以有效減少車輛直接對化石能源嘅依賴﹐英國及中國內地已就化石能源驅動嘅車輛設立終止銷售限期﹐分別係2030年同2035年。呢啲政策代表電動車嘅電池將會因為大量生產而令成本降低﹐亦可能造就其他可再生能源嘅儲存技術成本降低﹐帶動整體能源嘅改革。（研究 #價值鏈 嘅小編當然認為電動車係咪屬於零碳方案，其實好睇喺上游嘅發電廠係咪完全以可再生能源代替化石燃料發電……）  強制喺農業中使用綠肥 - 此舉將帶動綠氨的生產。而綠氨的製造關鍵是以可再生能源產生的氫 (即綠氫) 和空氣中的氮結合而成，從而改變目前主要由化石燃料如天然氣去生產肥料的方式。轉用綠肥同時將擴大綠氫生產的規模和降低其生產成本，長遠可為一啲高碳排放嘅產業例如係航空公司、鋼鐵生產帶嚟出路，減少碳排放。 公共採購植物蛋白肉 – 肉類及奶製品生產一向都係高碳嘅產業﹐佔全球碳排放15%﹐如果政府可以牽頭引入植物蛋白肉或乳製品替代的話﹐長遠更有效推動這些替代品的發展﹐減少畜牧業的排放同森林砍伐的壓力，從而引領世界走向可持續嘅綠色未來。（同樣地呢個講法從價值鏈角度都有所斟酌，要達到呢個減碳嘅目的都好視乎呢啲替代品嘅生產方法同模式，例如係所需嘅原材料或開墾土地資源作生產係咪真係零碳?） 睇返香港，呢三項措施入面﹐得到政策配合嘅主要就係電動車嘅發展﹐2021年發佈咗電動車普及化路線圖，提到會逐步取代現有嘅燃油車，並且喺2035年暫停燃油車登記，爭取喺2050年前實現碳中和嘅目標。但係其實除咗政府，商家同消費者都係重要嘅持份者之一！三者點樣令新嘅綠色技術、新嘅永續產品更加流行，從而降低綠色溢價，繼而再提升普及度，並且改變現有嘅線性經濟，係實現永續未來嘅關鍵。唔知政府係未來會唔會有更多響應全球大趨勢嘅措施推出呢？