港大港永續

你有冇諗過點解華南好多村落都係坐北向南，枕山環水而建？其實村民呢啲風水嘅考慮正正反映咗傳統農村生活與大自然嘅相處之道～ 以 #荔枝窩 為例，三百幾年前，客家人選擇咗依山傍水嘅地方建村。傳統認為山係「龍脈」，有利人丁興旺。風水村落講究「左青龍，右白虎，前朱雀，後玄武」嘅格局。後玄武係指村後嘅靠山，而左青龍右白虎係指村兩旁嘅山勢。群山環抱村落，可以作為天然屏障，保護村民同財產。村嘅正前方仲有小山丘作為屏障（前朱雀），阻隔風浪同埋海洋濕氣。荔枝窩村坐西北向東南，更配合咗華南地區嘅地勢，避開從大陸嚟來嘅寒冷西北風，亦都讓農地獲得最佳日照。 傳統村落重視「風水林」，村民會刻意喺後山保留茂密嘅半月形樹林，為村落聚財擋煞；砍柴同開墾梯田只准係風水林範圍以外嘅山頭進行。事實上，風水林可以起到防止山泥傾瀉、避免水源乾涸、改善村落微氣候，同埋提供經濟植物等作用。荔枝窩村後嘅風水林保存完善，淨係植物都有超過一百種，當中更包括本地稀有物種。荔枝窩村前沿海位置亦有一片銀葉樹林被村民視為風水樹林，可以保護村落免受海浪侵襲。 荔枝窩村前有溪環繞流，呈「玉帶環腰」格局。風水學說認為水勢彎曲平緩有助避凶，水流環抱嘅地方能夠聚財，產生好氣場。從科學嘅角度，蜿蜒曲折嘅水流形成更廣闊嘅肥沃土地，種植更多農作物以支持村中人口增長，人丁更旺！ 現代人或者會覺得風水似係迷信，但係從風水農村景觀嘅特色嚟睇，就會明白當中蘊含咗很多經驗累積嘅智慧！如果你都想從更多人類與大自然和諧共處嘅實例中尋求可持續發展嘅靈感，歡迎報讀我哋 # 永續社區證書課程嘅「#認識文化景觀」單元課程（網址： https://ccsg.hku.hk/....../understanding-cultural-landscape/）

「説到中學時期，家鄉一片片梯田，是我看過最美的綠地」──《梯田》周杰倫 梯田係好多喺鄉村長大嘅人心目中美麗嘅鄉愁。除咗美麗嘅風光，梯田更聯繫了悠長的人文歷史和包含重要嘅傳統農業智慧。不如今日我哋一齊黎認識一下其中一個最有名氣嘅梯田 - 世界文化遺產雲南紅河州嘅 #哈尼梯田 啦~ 哈尼族人嘅祖先遷徙到紅河谷地後，因為平地已經有其他民族居住，所以居住喺山上，沿山坡開闢梯田，利用氣候同地勢，取得豐收。紅河谷地氣候乾熱，河水蒸發上升，到咗哀牢山嘅時候遇到冷空氣，形成濃霧，最終落雨。大量雨水被密林吸納，然後形成溪流，再經由人工開挖嘅大小水溝長年不息咁灌溉梯田。 「水溝」係哈尼梯田嘅命脈，除咗用作灌溉之外，亦都有助施肥。哈尼族人會將堆積嘅動物糞便同枯葉等「廢物」作為肥料，呢啲肥料隨山水雨水順著水溝流入一層層嘅梯田，供應農作物所需嘅養分。 斜坡上嘅田有大有細，又屬於唔同家庭，咁水源要點樣分配？佢地會喺村内選拔德高望重嘅人做「溝長」，然後一齊協商水源分配，再由溝長喺塊耐腐蝕嘅木板上面刻上木槽，放喺分水口將水源分流到不同嘅支渠同梯田。 哈尼族人會係梯田放養鱔鱼、螺獅、泥鰍等水產，增加食物來源。呢啲動物又有助除蟲鬆土，令稻米生長得更好。族人仲會係田埂邊種植水芹菜同魚腥草等植物，可以防蟲又可以食用。大自然同哈尼族人互相依存，生命就好似梯田水流一樣川流不息。 哈尼文化同梯田互相交織，好多民歌都圍繞住佢地喺梯田嘅所見所聞，佢地嘅節日亦都與唔同嘅耕種時節有關。例如《哈尼四季生產調》就按住不同季節分別講述耕田耕作技巧、節日祭典同婚喪嫁娶等内容，透過口頭方式傳承梯田文化。 哈尼梯田係人類與大自然長期和諧互動而成嘅結晶，係別具意義嘅 #文化景觀，蘊含美學、生態、歷史同社會價值。想學習多啲關於文化景觀嘅知識，就記住喺8月23號前報讀永續社區證書課程既「認識文化景觀」課程啦！約定你9月開學，一齊學多啲！ 課程網頁：https://ccsg.hku.hk/....../understanding-cultural-landscape/

想種嘢就要開墾農地，咁係咪就一定要剷除樹林？唔一定嘅～ Agroforestry（#農林間作，又稱「混農林業」）就係永續農業嘅其中一種操作方式，會喺農田裡面保留／種植樹木，或者喺樹林裏面種植農作物，從而改善自然環境，同時促進農作物生產。 例如喺巴西亞馬遜州嘅城鎮阿普伊 （Apuí），農戶長期喺無樹木嘅農地上面種植咖啡，土壤退化問題嚴重，令產量下降，結果導致咖啡園荒廢。2012年，亞馬遜保護和可持續發展研究所（Idesam）就開始協助農戶用農林間作法喺園內重新種植咖啡，農戶獲得經費同埋當地原生樹種嘅樹苗，用嚟復育咖啡園。除咗咖啡之外，園內亦種植咗木材、水果、果仁等等，令農戶嘅收入來源更加多元化。咖啡產量幾乎倍增，農民生計得以改善。 喺香港，我哋中心亦喺 #荔枝窩 實驗緊農林間作法。荔枝窩嘅農地經歷長年荒廢，逐漸被次生林完全覆蓋。為咗保育荔枝窩嘅生態價值，當初開田復耕嘅時候特別保留咗原生嘅大樹同埋稀有樹種，再喺原生嘅樹林下面種植薑同咖啡等耐陰作物，增加樹林嘅生產力。我哋亦都有喺部分農林間作區裡面加入木瓜同埋其他不同高度嘅農作物，目的係模仿天然樹林嘅多層結構，一來充分利用空間，二來亦希望用不同植物製造適合嘅生長環境，甚至抑制雜草生長。 全球愈來愈關注農業嘅可持續性，「農林間作」嘅模式亦更加受到重視。如果大家想對「農林間作」認識更多，可以閱覽我地嘅網上學習資源（http://foss2.hku.hk/ecase_scalar/agroforestryinhk/）。