港大港永續

上回同大家分享咗企業永續風險披露框架「自然相關財務披露工作組」（TNFD）如何突顯國際間對生物多樣性呢個議題嘅重視﹐同埋加強咗企業喺呢方面嘅責任。上年2022年尾舉行嘅聯合國「#生物多樣性大會」COP15﹐亦都促成咗一個被喻為同《巴黎協議》有著同等意義嘅里程碑。大家可以睇圖了解「昆明-蒙特利爾全球生物多樣性框架」入面幾個突破性嘅重點。 香港政府2016年亦有首次發佈《#生物多樣性策略及行動計劃》﹐制定2016至2021年加強保育生物多樣性、支持本港嘅可持續發展﹐香港嘅商界都有積極參與。當時香港總商會仲作出正面回應﹐表達重視生物多樣性嘅保育﹐以及提出商界係推動呢方面進程嘅重要持份者之一。 商會列出數個重點表達企業如何參與﹐包括加強企業﹐尤其係中小企對生物多樣性有關嘅知識及潛在風險嘅認知﹐企業對相關風險嘅意識會主導佢哋嘅決策以及對未來發展嘅規劃。另外﹐亦期望政府能夠加強唔同部門嘅溝通﹐等相關新政策出台時能夠集合唔同界別嘅考量﹐制定出更全面嘅政策方向俾業界跟從。 睇番最近政府發表新一年度嘅財政預算案﹐當中都有提及政府有意發展 #綠色金融，為各項環保項目募集更多資金﹐不過環保團體就表示呢啲舉措需要配合相應監管措施﹐以減少「漂綠」嘅機會。例如機管局就擴建第三條跑道發行綠債，被綠色金融嘅國際環保組織Reclaim Finance發聲明質疑項目將破壞生物多樣性及破壞環境，係有潛在「漂綠」嘅風險。(咩係 #漂綠: https://bit.ly/43FhAhO) 此外，財政預算案亦提到，政府已就建造一千公頃嘅交椅洲人工島填海範圍、土地用途、交通基建、財務安排等提出初步建議，並展開公眾參與。但面對龐大填海造地計劃，絕對有可能對水質、生態同埋漁業造成不可逆轉嘅破壞。我地喺唔喺需要有更長遠嘅海洋空間規劃，以實現城市發展、民生保障和生態保育並存呢？作為其中一個持份者，唔知大家又點睇當中嘅機遇同風險？ #永續營商 #中小企 #永續價值鏈 #永續發展 #商界永續發展領袖計劃 #pslb #svc #businesssustainability #sustainabilityleadership #sustainability #business #sme #collaboration #sustainablevaluechains #sdgs #undp #HSBC @TheHongkongBankFoundation

我哋之前以北京密雲同台灣桃園嘅案例，介紹過政府和大學可以如何推動鄉郊活化。今次就睇下泰國一個鄉村如何發揮社群力量，應對大型水庫興建工程對佢構成嘅影響。 泰國中部最大嘅水庫「巴沙春拉西水庫」（Pasak Jolasid Dam）係由已故泰王蒲眉蓬於1989年提出興建，容量達7.85億立方米，主壩長4,860米，橫越華富里府同北標府。雖然呢個水庫具有提供農業同工業用水及防洪嘅作用，但係佢都導致超過16,000公頃農地流失，四條鄉村被要求遷移，Thai Boeng村就係其中之一。 Thai Boeng村村民大部分都因為水壩工程而失去了農地，生計大受打擊，但係佢哋拒絕接受補償同搬遷方案。佢哋擔心村落人口外移會難以維繫家庭同社區關係，破壞村民嘅身分認同，衝擊佢哋嘅文化傳統，於是決定留喺水壩區，並重整其鄉村經濟。 村民利用水壩帶來嘅機遇，成功從農業轉型至社區為本嘅旅遊同文化產業。佢哋一方面介紹該地區歷史同水壩建設，另一方面推廣文化體驗，俾遊客品嚐當地街頭食品，欣賞鄉村音樂舞蹈，仲有購買手工藝品等，不但止保護咗村民嘅生計，也延續了佢哋嘅傳統文化，體現出鄉村社群頑強嘅抗逆力！ 下次去泰國不妨考慮下，由曼谷乘搭火車去華富里，經過水庫就可以喺大壩打個卡！

唔知呢度有幾多人係Apple手機嘅忠粉？新手機嘅新聞發佈會後就同身邊親朋好友討論出唔出新機好﹐呢個循環小編都曾經樂在其中﹐但喺而家主張減廢減碳嘅大趨勢之下，循環經濟嘅概念陸續出現﹐促使大家去反思其實「消費主義」帶動嘅線性模式係唔係唯一嘅方式去維持生活質素呢？ 有一啲企業就喺產品設計上著手作出改變﹐創造出另類嘅營運模式﹐今次小編就要同大家分享一個荷蘭嘅手機品牌 #Fairphone，自成立以來就一直特別關注喺手機生產過程以至整個價值鏈中嘅可持續性同公平性。最近佢哋亦都推出左最新型號Fairphone 4，唔單止配備了唔少目前流行手機型號嘅規格，更加採用咗唔少嘅環保、回收材料以及可以讓用戶拆修手機嘅全模組化設計，目的係減少耗用資源。2021年，Fairphone發佈嘅Impact Report入面就分享到佢哋嘅電話對比起一啲每兩年就出新型號嘅手機而言﹐能減少8公噸嘅電子廢物以及668公噸二氧化碳！ 其實呢個別樹一格嘅產品設計就係運用咗循環經濟嘅概念。正如我哋喺之前嘅帖文講到，所謂循環經濟，就係指透過Refuse、Reduce、Reuse、Repair、Refurbish、Remanufacture、Repurpose、Recycle、Recover嘅「9R」原則，令一個生產周期嘅輸出可以成為另一個生產周期嘅輸入，生生不息，形成一個資源再生系統。而呢一部智能電話就係運用咗Recycle、Reduce同Repair，透過利用回收物料製作手機，減少生產產品所需嘅資源。另一方面亦都透過確保5年的零件供應與軟體更新、容許用戶簡便地自行維修，延長手提電話嘅生命期限，大大減少咗棄置電子廢物！ 大家可能冇留意到電子廢物其實係全球增長最快嘅都市固體垃圾！根據聯合國的一份報告，單單係2019年全球就產生咗超過5000萬噸電子廢物，但其中只有17%係被回收利用。睇返其他大型電子產品生產商，就好似蘋果，好多電子產品都係採用將內部組件粘合和焊接在一起嘅設計，用戶冇辦法自行打開產品內部進行維修，維修一定要由指定商家進行，同時亦收取高昂維修費，令消費者傾向選擇購入新的產品，冇好好善用到產品嘅整個生命期。 不過，連蘋果嘅新一代智能電話都開始逐步使用回收物料生產，2021年有20%嘅生產材料都係回收物料，係積極回應社會對環境情況關注嘅一步。作為用家嘅你唔知有會唔會都有興趣試下使用呢一部咁另類嘅電話呢？

鄉郊嘅生態及文化資產豐富而獨特，因此近年關於鄉郊保育嘅議題亦得到愈來愈多關注。鄉村保育嘅願景係以可持續嘅方式保護及管理鄉村嘅環境及文化資源，增加社區人士及公眾嘅保育意識，了解在地生態資源的可持續利用及本土文化發展，從而建立共同守護的精神。 森林村落︰梅子林及蛤塘永續鄉村計劃 嘅保育計劃涵蓋咗其中一個重要嘅客家文化資產——民族植物。民族植物係指與村民日常生活息息相關嘅野生植物，植物嘅各個部位可以用作食物、編織和清潔等用途，廣泛應用喺衣食起居上，讓人不禁讚嘆昔日嘅民間智慧。 喺度不如向大家分享幾種大家可以喺荔枝窩、梅子林及蛤塘等本地村落搵到嘅民族植物啦！ ● 餘甘子：果實嘅味道先苦後甘，佢嘅葉會喺曬乾後散發淡淡香氣，所以村民會用佢作為枕頭嘅墊料，同時亦有安眠嘅作用。 ● 山石榴：佢嘅果實盅爛加熱水後會變成泡泡，可以當作清潔劑。 ● 兩面針：幼苗兩面均有紅色針刺，有毒性，舊時村民會以根部入藥消炎及作為麻醉鎮痛之用。 喺度提提大家，部分野生植物具毒性，大家切記唔好亂碰、亂採、亂食！ 民族植物係咪好有趣呢？估唔到平時喺鄉郊見到嘅「野草」，原來背後有咁多價值！因此，鄉郊文化保育可以讓村民昔日點樣善用植物特性嚟結合生活所需嘅智囊得以研究及紀錄，而生態保育亦令民族植物得以喺村落中繼續生長和繁衍，保護鄉郊嘅生物多樣性。同時，各種公眾教育活動和實地考察讓大眾認識呢啲原生植物，從而理解與大自然和諧共存的重要永續概念。 大家想唔想認識更多關於民族植物嘅知識及應用？依家機會嚟喇！喺復活節期間，《森林村落︰梅子林及蛤塘永續鄉村計劃》推出「復活節香。草限定」活動，舉行「認識鄉郊民俗植物之旅」及「天然蚊香塔體驗」，屆時會有在地導師帶大家探索梅子林一帶嘅民族植物及動手製作蚊香塔。有興趣了解更多活動詳情嘅朋友，可以到訪 森林村落︰梅子林及蛤塘永續鄉村計劃 的Facebook 或 Instagram 專頁。 圖片來源: 醫院管理局-香港有毒植物圖鑑

印度作為四大文明古國之一，擁有非常悠久嘅歷史同豐厚文化。其中茶文化喺印度人嘅心目中不可或缺，係當地人日常生活必需品之一。最出名嘅茶葉包括大吉嶺 (Darjeeling ) 紅茶、阿薩姆 (Assam) 紅茶同尼爾吉利 (Nilgiri) 紅茶等等。 而來自印度東北部嘅Woolah Tea公司，佢哋就推出咗一款叫做「Truedips」嘅裸裝茶包，去除咗平時用嚟裝住茶葉嘅外層包裝袋，透過加工技術將一整塊原茶葉壓縮成一個小方體，當沖泡嘅時候茶葉就會慢慢展開成原本葉脈形狀，唔使用額外包裝之餘，亦都唔會飲到茶葉碎。佢哋現時已經拓展到加拿大、澳洲、美國、中東、歐洲等市場啦！大家又期唔期待喺香港買到佢哋嘅產品呢? 有興趣了解多啲嘅朋友，click入呢條片睇下佢哋嘅理念啦https://www.youtube.com/watch?v=xwKMA5ODeu0

想去荔枝窩玩，又想行埋梅子林及蛤塘？呢三條客家村落處處充滿文化特色，又有豐富嘅生態資源，當然值得一步步慢慢了解，但係想隨時隨地搵人導賞講解唔係一件容易嘅事，點算好呢？ 「森林村落︰梅子林及蛤塘永續鄉村計劃 」早前推出「自遊森活」手機應用程式，讓大家到訪荔枝窩、梅子林及蛤塘嘅時候，可以透過自助導賞嘅方式，與三條村嘅在地景點進行多元化互動，深入探索自然生態及體驗客家生活文化。「自遊森活」手機應用程式有三個核心功能： 1. 「自助遊」導賞地圖： 透過定位地圖，你可以隨意探索荔枝窩、梅子林及蛤塘三條村落。導賞地圖同時設有歷史文化、自然生態、藝術文化等特色景點嘅資訊欄，讓你輕鬆了解村落各種面貌。 2. 「森林村落叢中尋」野外定向遊戲： 設有幾條路線，你可以根據遊覽時間及步行能力，自行選擇遊戲路線，前往各個遊戲點完成任務，達到指定分數更有機會獲得獎品。透過喺村中盡情探索，希望你能夠深度體驗村內嘅自然氣息及人文特色，成為森林村落守護者！ 3. 「留下你最美好的蛤塘及梅子林回憶」照片分享： 除咗欣賞其他遊覽者分享嘅相片之外，歡迎向大家分享你喺遊歷過程中嘅難忘回憶。 請即透過Google Play或Apps Store 搜尋「自遊森活」，或click入以下連結下載應用程式：https://ccsg.hku.hk/forestvillage/appdownload 喺遊覽呢三條村落嘅時候，你可能會留意到村落不同位置掛咗下圖所顯示嘅精緻小盒，佢地就係「自遊森活」藍牙感應裝置，內置一套藍牙感應器，配合「森林村落叢中尋」野外定向遊戲嘅運作。裝置以立體打印技術製作，輕身耐用，並減少物料嘅浪費。裝置表面更特別設有五個小孔來增添生態功能，進行 #昆蟲酒店 實驗！小孔其實係通向木盒內部嘅細小管道，嘗試為獨居蜂提供棲息空間。 注意：由於藍牙感應裝置以遠距離非接觸式運作，大家切勿觸碰，以免影響感應器穩定度及干擾正使用昆蟲酒店嘅生物。