港大港永續

科學研究唔再係科學家先可以做！近年冒起「#公民科學」(Citizen Science) 一詞，即係非專業研究人員嘅你同我，都可以志願參與收集科學數據嘅環節，為科研出一分力！ 公民科學活動通常由非政府機構或學者帶領，調查範圍非常廣泛，從生物科學、天文學、考古學至社會科學，甚至可以係海陸空任何一環。而香港就比較常見同生態相關嘅公民科學活動，例如係濕地觀察侯鳥嘅品種和數目、紀錄郊外野花嘅開花時間、甚至拍攝海洋中珊瑚礁嘅照片，檢視珊瑚白化情況。 大家千祈唔好睇小公眾參與對科研發展嘅貢獻～生態資料需要科學家花長時間同體力去觀察收集，但研究團隊嘅能力始終有限。公眾嘅力量可以深入郊外每個角落，甚至去到研究人員難以觸及嘅隙縫，填補一直缺失嘅生態資料，提供重要基礎數據。如果發現本地特有物種，更加可以增加該地方嘅國際知名度，補充全球生物多樣性的資料庫。 早前 Outdoor Wildlife Learning Hong Kong 香港戶外生態教育協會 主辦咗「環保基金『蟲』新發現南大嶼」活動，參加者只用咗63日，就搵到11,943 個有效觀察紀錄。當中一半嘅紀錄達「研究級別」（即可供專家、研究者、政府機構使用），涵括 1,367 種物種，相當於過去12年iNaturalist喺當地收集到的數據量！我哋中心嘅森林村落團項目隊亦聯同香港戶外生態教育協會合辦過兩個主題嘅「公民科學家營」，主題分別係森林碳儲存同昆蟲生態速查，參加者所得嘅數據為「森林村落」嘅生態研究建立重要嘅基線資料，包括樹林碳儲存量及物種數據，幫助我哋持續監察梅子林、蛤塘嘅生境變化，制定更好嘅保育策略。 如果你都想學習有關生態嘅知識，同時為香港嘅生態研究出一分力，你可以留意「 森林村落︰梅子林及蛤塘永續鄉村計劃 」日後舉辦嘅公民科學家計劃，或者用手機下載iNaturalist，紀錄係香港郊外沿途見到嘅動植物，成為公民科學家嘅一份子！

一直以來，政府同非政府機構投放唔少資源推動共融就業。要成功實踐共融就業, 商界嘅積極參與同支持係不可或缺。一啲跨國公司或大型企業制定「多元、平等、包容（DEI）」政策，嘗試利用管理、框架守則同行動計劃嚟締造共融工作間。而長遠使共融就業植根於企業同令商界持續地參與，關鍵在於建立雙贏局面同令聘用殘疾人士成為公司文化。 我哋一齊click入以下link，以九龍巴士（一九三三）有限公司嘅經驗為借鏡，睇下會唔會為我哋帶來一啲啟示啦！ https://platformforinclusion.hk/sharing/KMB －－－－－－－－－－－－－－－ 從未聘用殘疾人士，想知道該如何鋪排、逐步開放更多工作機會？機構中#DEI 政策行之有年，想向其他機構取經，增進自己團隊嘅共融知識同行動力，提升ESG中 S（社會）嘅表現？想了解殘疾人士培訓同就業市場嘅最新發展，認識坊間聘用緊殘疾人士嘅社企，探索下合作新火花？ 歡迎各商企人士、中學老師參加本中心喺7至8月舉行嘅「#學職兼融－商校合作嘉許計劃」，當中包含多節免費分享會、參觀、工作坊以供選擇，上面文章提及嘅 #九巴都係我地今次計劃嘅夥伴之一，報名即可參觀佢地九龍灣車廠！ 合作夥伴眾多，呢度講唔晒，立即點擊下面comment box中連結了解更多

開番關一段時間，唔知大家有無「報復式」去旅行去番夠本呢？大家旅遊時又會根據咩準則選擇機票?而家除咗「最平」、「最快」同「最好出發時間」嘅排序方式之外，仲出現咗「二氧化碳排放量最低」嘅選項，旅客可以根據航班嘅二氧化碳排放量選擇機票，減低旅遊時嘅碳足跡。 航空業佔全球二氧化碳排放量嘅2.5%，係交通運輸類別中第2大排放源。研究指出，如果航空業係一個國家，佢將會係世界第6大排放體，僅次於中、美、印、俄、日。咁航空公司又係點計算航班嘅二氧化碳排放量呢? 根據各個提供航班碳足跡嘅網站，佢哋嘅計算方法都有不同之處。 以Skyscanner為例，網站會綜合航班嘅機型、機艙座位數量、平均載客量同轉機次數等為航班評分，如果排放量低於某個數值，就會獲得「綠色之選」標誌推薦俾客戶; 另一個平台Google Flight 就會採用歐洲環境署 (EEA) 嘅演算法嚟估算航班嘅碳排放量，再列明唔同航班會產生幾多公斤二氧化碳，令消費者可以得到詳細嘅資料作比較。 除咗選用低二氧化碳排放量航班之外，其實仲有唔少做法可以減低碳排放，實踐 #永續旅遊 (Sustainable Tourism) 㗎！例如係: — 避免多次短途飛行，或者盡可能使用其他運輸工具，例如鐵路、巴士等取代飛機 — 自攜零食、餐具、同耳機上機，避免使用飛機提供嘅一次性物品 — 下載航空公司登機App，以電子登機證取代實體登機證 — 喺外地旅遊時盡量選搭公共交通工具，避免以的士、私家車代步 — 選用環保旅館/酒店，拒絕每日更換毛巾 — 謹慎購買紀念品只選購具實用性產品，避免過量購物等等 喺去旅行嘅同時不妨考慮選用低碳航班同參考以上建議，就可以遊覽世界各地之餘又實踐永續生活，為保護環境出一分力啦

《共凝滙創‧永續社區：滙創永續先鋒的社創旅程》出版啦！呢本書集合咗由 The Hongkong Bank Foundation 滙豐銀行慈善基金 支持嘅 #滙創永續計劃 中十五個「#永續先鋒」嘅故事。 除咗記錄佢哋由孕育永續理念，到設計、構思，再成功推出產品嘅心路歷程之外，亦記載咗我哋對香港永續發展嘅共同願景，希望透過分享振奮人心嘅故事，鼓勵更多優秀嘅「永續先鋒」實踐永續想法，為社會、經濟、環境創造更多價值，共同建構一個互惠互利嘅永續社會。 呢本書亦為滙創永續計劃劃上完美句號，總結計劃喺三年間取得嘅成就同經驗，承載我哋與「永續先鋒」們嘅回憶仲有對未來嘅憧憬。希望「永續先鋒」可以喺社創之路上大展鴻圖，繼續發光發亮 等我哋一齊翻閱呢本書，同「永續先鋒」們遊歷佢哋嘅旅程，洞察佢哋嘅所思所想啦！話唔定故事可以連繫到有心人，進一步支持佢哋嘅計劃!!! 線上閱讀《共凝滙創‧永續社區：滙創永續先鋒的社創旅程》：http://bit.ly/3lRs6Se 如果想要《共凝滙創‧永續社區：滙創永續先鋒的社創旅程》嘅實體本，歡迎到以下地址免費索取。地址：香港大學公民社會與治理研究中心 香港薄扶林道香港大學百周年校園賽馬會教學樓七樓七零三室

記唔記得上次我哋介紹過一間喺日本叫做Avatar Robot Cafe DAWN ver.β嘅 café，專門聘請殘疾人士，包括漸凍人症 (ALS) 患者同輪椅人士搖拒操控喺餐廳嘅機械人？(原post: https://bit.ly/40wcy4q) 原來喺香港都有餐廳專門聘請行動不便嘅殘疾人士喺屋企/院舍控制喺餐廳嘅客服機械人，佢就係 厨尊香港Dignity Kitchen Hong Kong ！ 「廚尊」係一間位於旺角嘅新加坡餐廳，餐廳入面嘅機械人「 #TEMI」身上有咪同鏡頭，而負責操作機械人嘅員工可以足不出戶透過機械人同餐廳入面嘅食客互動，解答佢哋嘅問題之餘，亦可以了解食客嘅意見，借助科技優勢為殘疾人士創造更多職位 有興趣知道更多嘅朋友，就快啲click入呢條link知多啲關於「廚尊」嘅故事啦！ https://platformforinclusion.hk/sharing/dignitykitchen

#SDGs (Sustainable Development Goals) 我哋就聽得多啦，而喺丹麥哥本哈根南部的 Ørestad 市區入面，即將會有一個完全依照17個SDGs而建嘅生態村出現，最快今年2023年夏季就會有居民開始入住啦！ 呢條生態村叫做「UN17 Village」，總共有5棟建築物，可以俾大約1100人居住。發展呢條生態村嘅地產商「NREP」表示，要達到17個SDGs絕非一件容易嘅事，有時目標同目標之間可能會有衝突，需要考慮目標嘅先後次序同作出取捨。所以，發展商就劃分咗⿦大範疇，包括係生物多樣性、社區、醫療保健、建築材料、水，以及能源，希望可以借助呢個框架實現17個SDGs。 而NREP根據呢個框架就諗咗一系列嘅措施：例如係喺社區旁邊設立一個有222公頃大嘅自然保護區，作為不同種類嘅野生植物同動物嘅棲息地; 喺社區亦有大大小小嘅庭院，種滿同保護區類似嘅植物，希望人類同大自然可以融洽共存; 屋頂同庭院可以收集雨水，用作灌溉植物; 生態村同時為居民提供共同生活空間，每一個樓層都有社區廚房，亦設有電視房、閱讀室、休息室、健康料理烹飪班等等，令居民更易建立友好鄰里關係; 居民可以喺社區嘅共享經濟中心捐贈/借用物資、維修單車同家具、交換二手物品; 建築物之間同屋頂上設有步行徑，亦有唔同類型嘅體育中心，鼓勵居民花多啲時間喺室外活動; 環保目標方面，發展商盡量使用低碳材料，例如木材、低碳水泥等。 NREP表示需要達成嘅目標唔少，無可能做到十全十美，因此只能夠從人類同大自然相互依存嘅關係中取得平衡。唔知大家聽完UN17 Village嘅介紹之後有無心郁郁想搬入去住呢？ 有興趣想知多啲嘅朋友，可以click入UN17 Village嘅網頁瀏覽更多 https://www.un17village.dk/en