港大港永續

我哋上次介紹咗 #共益企業 B Corp嘅模式，喺追求利潤嘅同時協助解決社會上嘅一啲問題，達致企業同社會共同得益。我哋今次就帶大家去英國睇下另一種類似嘅公司型態，叫做＃社區利益公司 (Community Interest Companies)，簡稱 #CIC。 CIC 係以有限責任嘅公司形式成立，即係如果公司經營不善，亦都唔會波及到股東嘅個人財產。而營運 #CIC 係以達到社會利益為最終目標，多於追求企業盈利，可以話係一間擁有法律地位嘅社會企業。為咗保證CIC嘅資產、收入同利潤都有投放喺社區服務到，CIC公司需要進行「資產鎖定」(asset lock)，意指公司持有嘅資產要以經營活動或其他方式造福社區，亦有明確指示利潤分配嘅累計總額唔可以超過可分配利潤總額嘅35%。除此之外，英國政府亦都會要求CIC公司必須喺公司章程上清晰表明佢哋嘅社會理念以及具體嘅實現方法。如果日後需要更改呢啲目標，係要經社區利益公司規管局（Regulator of Community Interest Companies）批准架！ 好似B Corp咁，社區利益公司每年都要向監管機構提交年度報告，當中要明述公司點樣履行佢哋嘅目標、相關利益者嘅參與、對社會嘅影響、同埋其他財務信息，例如酬勞同股息等等。規管局亦都有權查閱公司紀錄同文件，所以透明度係相當高！而註冊為CIC嘅程序比慈善團體相對簡單，對CIC嘅規限同對年度報告嘅要求亦都相對寬鬆，所以註冊為CIC係比較方便，亦吸引到更多人成立。 為咗鼓勵更多人對社會組織投資，英國政府喺2014年訂立 #社會投資稅收減免政策，只要喺慈善組織、社區利益公司同社區福利團體有股權同一定嘅債務投資就可以獲得稅收減免。而喺完善嘅法規之下，社會公益公司亦都能夠享有同一般公司對等嘅法律身分。同時，社會大眾能夠清楚了解佢哋喺社會公益層面上嘅工作，吸引投資者同社會大眾嘅支持。 香港現時未有為社企成立相關嘅法律或者註冊制度，所以社企同一般私營企業無異，都要遵從所有適用於其企業同業務性質嘅香港法例。社會企業嘅形式包羅萬象，而社會對於佢哋嘅需求亦不斷改變。香港社會創新嘅未來方向會唔會都可以參考英國例子，成立類似CIC嘅企業模式，鼓勵更多人成立社會企業呢？

低利潤有限責任公司(Low-profit Limited Liability Company)，簡稱L3C，係美國第1個以立法形式成立嘅社會企業。同其他社企一樣，L3C都係以達致社會效益為主要目標，但同時亦會追求利潤。而佢嘅特別之處就係以有限責任嘅公司形式成立，喺保障到股東個人財產嘅同時，亦可以利用社會企業嘅品牌作市場優勢，吸引更多人投資同支持。 成立L3C公司要首先滿足以下3個條件： 1）以實現美國國內收入法典（Internal Revenue Code，簡稱“IRC”）內規定嘅慈善或教育目標為重點，而且該目標要係公司成立嘅不可或缺原因; 2）不以創造收入或者財產增值作為公司核心目標，但亦都容許喺其他情況下有重大收入或者資本增值; 3）不以IRC中規定嘅政治目的作為公司目標。另外，IRC仲規定L3C公司必須喺公司名入面包含 “Low-profit Limited Liability Company” 嘅字，等大眾可以一眼辨認出。 同時，L3C亦會吸引到唔少基金會嘅投資，原因係美國稅務局規定咗私營基金會必須每年使用至少5%嘅資產於慈善項目或活動上，先可以享受稅收豁免待遇。而L3C嘅出現，正正就可以幫基金會滿足呢個條件。基金會喺投資社會企業嘅同時，又可以申請税務豁免，仲有機會獲得投資回報，所以L3C都吸引咗唔少基金會嘅資金架！ 到目前為止，已經介紹咗唔同嘅社企商業模式，分別係 #共益企業BCorp、#社區利益公司CIC 同埋今次講解嘅 #低利潤有限責任公司L3C。佢哋各有特色，亦有唔同嘅好處，都蘊含咗關注企業營利並強調社會公益嘅多維度企業價值觀。唔知邊款模式最吸引到你哋呢！ 想重溫內容？無問題！立即睇番之前嘅介紹！ 社區利益公司 (CIC): https://www.facebook.com/allabouthksustainability/posts/147900837874669 共益企業 (B Corp): https://www.facebook.com/allabouthksustainability/posts/145172358147517

「酒呀！我要酒呀！」 「咪飲咁多啦！你知唔知呀，發酵同蒸餾酒精嘅過程好唔環保、好高碳排放量，仲要消耗好多水架！」 「吓！乜你無聽過而家有支vodka專門捕捉二氧化碳 (carbon dioxide) ，有助減少溫室氣體 (greenhouse gases) 架咩？」 「咩話？？！！！」 . . . 無錯！一間美國初創公司Air Company，喺2020年推出咗世界上第款直接用 #溫室氣體 之一嘅 #二氧化碳 製成伏特加，將導致 #全球暖化 加劇嘅氣體溝埋水，就變成咗一支令人鍾情又 #負碳排 (carbon negative) 嘅 Air Vodka。 Air Vodka中嘅二氧化碳原料主要來自大氣同紐約嘅工業同肥料廠，將二氧化碳連埋透過電解獲取嘅氫氣 (hydrogen) 一齊送入「碳轉化反應器」（carbon conversion reactor）系統，就會產生酒嘅主要成分乙醇 (ethanol)，最後再同水結合，就會變成令人醉醺醺嘅伏特加架啦！而傳統蒸餾酒精嘅方法係需要用到35公升嘅水，先可以製造出一公升的蒸餾物。相比之下，平均每支Air Vodka有助清除約一磅二氧化碳，耗水量亦都大大減少，口感仲比傳統vodka更似水般清澈無雜質添！ Air Company 聯合創辦人兼行政總裁 Gregory Constantine 表示佢最希望嘅係可以利用科技改善全球暖化嘅問題，將碳轉化呢種技術應用到各個領域，直接將二氧化碳轉化成有價值嘅商品。除咗可以做到 #零碳排放，即係指碳排放量接近零，仲可以達到 #負碳排，意指生產過程中所清除嘅二氧化碳量多於所排放嘅二氧化碳量。 Air Company 除咗有售賣vodka之外，亦都有推出負碳排嘅香水同消毒搓手液，相信將來仲會喺市場上推出各式各樣嘅 #碳捕捉 產品，致力解決氣候變化嘅問題。 有興趣了解多啲嘅朋友，可以click入呢條片睇下佢哋係點樣由二氧化碳製成一支支精美可口嘅伏特加https://www.youtube.com/watch?v=usnKH_B_rbo 如果大家想知道更多關於世界各地有趣嘅 #社會創新 例子，就要密切留意住我哋嘅 #社會創新個案研究系列 啦！我哋下次再見！