港大港永續

素食文化歷史悠久，由中國古代南北朝起，就出現專門記載素食嘅食譜，而到咗宋代，就更加有「仿葷」菜式，就如而家嘅「新豬肉」，有「假雞」、「假煎肉」、「假乳鴿」等等嘅烹調做法出現。古人茹素之所以得到重視，主要都係因為宗教原因，除咗有「齋戒以告鬼神」嘅概念，中國素食文化亦都糅合咗道家嘅清心寡欲、儒家嘅清淡養生、仲有佛家嘅慈悲不殺生。 嚟到現代，唔少人改食素嘅主要原因除咗係想身體更加健康外，亦可能係想為減少碳排放出一分力，又或者係出於反對傷害同剝削動物。因此，除咗素食文化外，亦都出現咗另一種生活哲學 — 純素主義 (Veganism)，志在反對購買任何以動物製成，或者會為動物帶來痛苦嘅商品，如皮革、羽絨、羊毛等，同拒絕參與任何傷害動物嘅消費行為，例如參觀動物園同馬戲團。 而喺印度就有一間初創企業 — Phool 研發咗一種「純素」皮革 —「Fleather」，利用因祭祀儀式而被大量棄置於印度恆河嘅鮮花取代動物皮毛，將廢棄花卉「升級再造」(Upcycling) 之餘，亦實行動物友善，同時保護動物福祉。而平時普遍由聚氯乙烯 (PVC)、聚氨 (PU) 同聚酯 (Polyester) 製成嘅人造皮雖然都無使用動物皮，但係呢啲人造皮嘅原材料都係來自石油，喺分解過程中會釋出對環境有害嘅物質，所以相比之下，「純素」皮革更勝一籌。 追求時尚都唔代表一定要環境付出代價架！只要願意實踐，時尚、環保同動物福祉都可以有和平共存嘅一日🫱🏻‍🫲🏻。 有興趣了解多啲嘅朋友，可以click入呢條片 (由03:30開始) 認識Phool嘅創辦理念 https://youtu.be/9XAd4EwkU9U?t=210 如果大家想知道更多關於世界各地有趣嘅 #社會創新 例子，就要密切留意住我哋嘅 #社會創新個案研究系列 啦！我哋下次再見！

「氣候相關財務披露工作組」(TCFD) vs 「自然相關財務披露工作組」(TNFD) 全球氣候變化影響逐年加劇，國際金融穩定委員會（FSB）成立之氣候相關財務披露工作小組（TCFD），於2017年發布了一套供企業自願性評估的揭露架構，旨在協助企業同埋投資者更準確地檢視同評估氣候變化可能對企業造成嘅正面與負面衝擊。工作小組由32名成員組成，分別來自不同組織，包括銀行、保險公司、退休基金、資產管理公司、信用評級機構等。 呢個氣候信息披露框架陸續獲得各監管部門同金融機構建議採納。然而，國際社會逐漸意識到生物多樣性嘅喪失和生態系統嘅破壞係氣候變化以外嘅另一場危機，正為全球經濟同社會帶來巨大挑戰。2020年7月﹐另一個極具份量嘅披露框架「自然相關財務披露工作組」(TNFD) 宣佈組建﹐並於2021年6月正式啟動﹐同時得到政商界支持，包括 G7 的財政部長和「G20 可持續金融路線圖」已認可 TNFD 喺自然同生物多樣性量度同匯報工作方面嘅領導地位。 睇到呢度﹐大家可能會問﹐兩套框架究竟有乜唔同？關鍵詞在於一個係針對「氣候相關」，另一個係「自然相關」嘅披露。「氣候相關」，故名思義就係專注於企業對氣候變化風險嘅承受力、有否制定應變措施做好風險管控，以及如何把握氣候風險對業務營運帶來嘅商業機遇。不過TCFD呢個框架有一個缺口﹐就係無辦法反映世界係一體嘅呢個事實﹐因為人類與自然嘅互動以至到生態系統內各物種之間都有著千絲萬縷嘅關係。所以TNFD嘅出現就係希望企業不要忽視「自然資本」嘅重要性。想詳細了解兩個框架嘅分別﹐就參考以下嘅Infographic啦！

台灣近幾年推動學界社會責任實踐，鼓勵大學整合知識、技術和資源，關心社區需求，促進在地人才培育，解決地方問題。就等我哋從台灣嘅「歸蜜計畫」(Green Meet) 睇吓大學點樣履行社會責任，連結城鄉，推動鄉郊活化。 「歸蜜計畫」由台灣政治大學社會實踐辦公室推動，選址桃園。當地鄉間原住民受規劃限制而只能從事初級產業，加上受到氣候變化影響，更加難以脫貧。有見及此，政治大學於是請農友讓佢哋喺農場裡面免費擺放蜂箱，收成嘅蜂蜜有一部分會回饋給農友（以蜂蜜或相應價錢的形式），為原住民提供「被動式收入」。而且，收存蜂箱的農友因為多了蜜蜂幫助農作物授粉，農產量亦有所增加（有農友表示產量大增三成）。 鄉郊活化一定要吸引年輕人參與，政治大學與在地高中合作，訓練木工科學生製作蜂箱，裝備佢地喺鄉間創業。另外，開發蜂蜜加工產品亦都係可以與在地高中合作嘅範疇。 除了能夠提振社會和經濟，「歸蜜計畫」同時都惠及生態。如果農場使用化學肥料和殺蟲劑，蜜蜂會很容易死亡，所以參與計畫嘅農友會從事有機耕作，保護農場生態之餘，農產也能以較高價錢出售。計畫特別選用台灣本土蜂，而唔跟隨主流使用外來種義大利蜂，因為本土蜂較能適應高海拔環境，能夠為山區農作物授粉。本土蜂蜂蜜嘅售價更加係義大利蜂蜜嘅兩倍。 大家或者會疑惑，大學何來有資金起動「歸蜜計畫」？政治大學其實扮演了聯繫城鄉嘅角色，遊說支持項目理念嘅城市人投資認購蜂箱。大學透過售賣蜂蜜和蜂蜜蛋糕、蜂蜜啤酒等加工品，所得嘅部分收益會回饋俾投資者。唔少投資者去鄉郊探訪蜂箱嘅時候亦會在鄉郊消費，促進當地經濟。大學成功將鄉郊經濟聯繫城市資金，也幫助鄉郊社區為城市人提供更多安全的食物，促進了城鄉共生。 如果想了解更多關於「歸蜜計畫」嘅詳情及認識更多鄉郊活化例子，可以睇我地「永續鄉郊－亞太區合作計劃」舊年圓桌會議Facebook直播：https://www.facebook.com/hkuccsg/videos/5173315699424130（「歸蜜計畫」介紹由50:47開始）又或者歸蜜Green Meet計畫官網：https://www.greenmeet.tw/

全球應對氣候變化刻不容緩已經係一個不爭嘅事實﹐但係究竟點樣先可以達到呢個宏大嘅目標呢？為左能夠更有系統地去量度企業嘅策略係咪真係有效控制全球平均升溫喺攝氏1.5度以內﹐國際間致力推動科學基礎減碳目標 (Science-based targets) 呢一套針對企業減碳嘅科學化流程。就等我哋一齊了解一下佢嘅運作同埋利弊啦！ 呢一套減碳框架係「科學基礎碳目標倡議」(Science-based targets initiative, SBTi)嘅一部分﹐而呢個倡議由多個組織包括CDP、聯合國全球盟約 (UN Global Compact, UNGC)、世界資源研究所 (World Resources Institute, WRI)、世界自然基金會(WWF)共同發起。目標起初係按照《巴黎協定》限制全球暖化幅度唔超過工業化前水平2℃而成立，而呢個水平係建基於科學家以各種氣候模式及減碳情境來推算大氣中的二氧化碳濃度不能超過450 ppm。如果要令地球更加適合人類居住，有研究指最終希望能夠響應 IPCC《全球升溫攝氏1.5度特別報告》1.5℃嘅統一目標。 如企業計劃通過SBTi審核，申請過程主要包括幾個步驟： 承諾 -> 以書面形式表達有意為企業設定科學減碳目標 制定 -> 建立符合SBTi評審準則的企業減碳策略 提交 -> 將減碳策略提交到SBTi作審核 溝通 -> 公佈減碳目標給有關持份者 披露 -> 每年披露企業的碳排放數據以及追蹤減碳目標的進度 成立咗呢個目標除左令企業可以更有科學依據地減碳﹐以達至控制全球平均升溫嘅效果之外﹐都仲有其他好處嘅﹐例如係建立品牌聲譽，提升投資者信心。科學嘅介入可以令公司嘅可持續性管理更有效，亦會對跟進實際減排情況有更好嘅掌握。其實訂立科學減碳目標除咗防止氣候變化加劇，同行之間亦都可以互相激勵，建立良性競爭之餘，促進創新㗎！例如太古地產就係本港首間承諾支持SBTi嘅地產發展商，積極從引入創新科技、採購可再生及清潔能源、加強供應鏈夥伴合作等措施實現目標。 不過講完好處﹐都唔代表SBT一啲問題都冇，有研究質疑SBTi驗證嘅評級結果。要知道，SBTi 係唔會對外公佈對公司氣候目標嘅完整評估，而當中更有漂綠 (greenwashing) 嘅嫌疑。研究所New Climate Institute指出多間被SBTi 認證為與1.5℃或 2℃兼容嘅跨國公司喺計劃中所採用嘅減排措施或碳抵銷做法嘅細節極具爭議，透明度 (transparency) 同埋誠信 (integrity) 都非常低。 例如美國醫療保健公司 CVS Health就被指操縱減排基準線，報告中特登用排放量異常地高嘅2019 年為基準年，排放量足足比 2017 年、2018 年或 2020 年高出 70至80%咁多！ 換言之，公司就可以容易啲實現到 2030 年減排47%嘅目標，而最終得到SBTi驗證1.5℃兼容嘅最高評級，有誤導成份。 睇嚟現時SBTi嘅審查制度仍然存在一啲需要改善嘅地方﹐唔知你又有咩睇法呢？

城市同鄉郊睇落好似兩個極端，不過要永續發展，就梗係唔可以將兩樣嘢分開嚟睇喇！ 其實城鄉共生 (咩係城鄉共生: https://bit.ly/3Xj3FcT) 係全球重視嘅概念，中國內地亦以「鄉村振興」同「城鄉融合」為發展戰略。今次我哋就同大家分享北京密雲區點樣利用生態及農業資源去推動鄉村振興。 密雲係北京市面積最大嘅生態涵養區，亦係首都最重要嘅水源地，擁有市內最大嘅水庫同豐富森林資源。密雲積極推動農業綠色轉型，建構農業 #綠色供應鏈，例如將漁農業廢棄物製成有機肥料，並利用廢棄物所產生嘅沼氣作為可再生能源，為農產加工廠提供電力，而加工廠嘅有機廢料亦會轉化成肥料。 「綠水青山就是金山銀山」，密雲十分著重保護生態、農地、景觀同生物多樣性，並借助其生態優勢，結合精品高端農業，發展文化旅遊及休閒產業，增加當地民眾嘅收入來源。喺五年時間裏，園區興建超過100間精品鄉郊民宿，促進當地綠色旅遊，並且聘用大約300名農民從事民宿保潔、服務等，平均每戶年收入增約5萬元人民幣。 密雲仲建立咗生態文明制度，訂立相關標準同評核機制，亦推出環境資訊公開系統，監察企業以及政府部門，確保相關資源運用得宜，政策得以落實。 如果想了解更多關於密雲案例嘅詳情及認識更多鄉郊活化例子，可以睇我地「永續鄉郊－亞太區合作計劃」舊年圓桌會議Facebook直播：https://www.facebook.com/hkuccsg/videos/5173315699424130（密雲案例由1:21:50開始）

雖然情人節啱啱過左﹐但老土啲講﹐只要開心﹐天天都係情人節啦。小編就介紹你哋去各區嘅海濱長廊，喺燈火璀璨嘅維港岸邊拖住手漫步，加上別出心裁嘅節慶藝術裝置，成件事都真係幾浪漫﹐邊洗等情人節喎~ 小編之前就喺炮台山東岸公園見到一個用竹管創作、四面呈心形嘅大型裝置，晚上加埋柔和嘅燈光，非常IG-able（打卡一流）㗎！ 呢件藝術裝置出自本地建築設計公司 ARTA Architects（凝態建築設計）團隊手筆，佢哋公司規模唔大，但喺成立咗短短一年多嘅時間已經做出唔少街知巷聞嘅作品。最近小編同過ARTA兩位年青有為嘅創辦人Arnold同Tat傾偈，佢哋都好強調想透過呢啲藝術裝置拉近大眾之間嘅距離，傳遞創作心意。不如我哋睇下ARTA點樣體現環境與社會永續，實踐以「永續城市及社群」、「產業、創新及基礎設施」、「負責任消費和生產」為核心嘅工作模式啦！ 1. 以創新設計加強社區共融 以《北角交響樂》為例，Arnold同Tat透過工作坊同埋觀察北角街頭嘅互動，決定用聲音同音樂聯繫社區內唔同背景以及不同年齡層嘅人。過程中，ARTA同非牟利組織「北角樂Teen會」合作安排工作坊，收集當區年輕人對唔同設計方案嘅意見，最終設計出一個聲音交流裝置。市民亦有機會發揮想像力發掘新用途，例如喺裝置上敲出不同嘅聲音、俾佢哋坐低歇息。建築設計只係一個框架，框架規劃出來的空間卻可以載滿創意，任由使用者發揮。 2. 累積經驗，靜待時機 佢哋明白唔好放棄任何一個機會，只要堅持嘗試，會有更多嘅機會！喺2018年公司仍未成立前，Arnold跟兩位同樣係建築師嘅大學師兄Stephen和Keith參加左「綠在灣仔」比賽，收集大量來自灣仔酒吧的二手酒樽，循環再造成玻璃磚，可是不幸落選。但係佢哋無放棄，反而改良想法，兩年後成功製作環保玻璃磚，亦利用不同玻璃樽嘅顏色差異做咗一個藝術裝置。果次展覽為剛剛成立嘅ARTA帶嚟南豐集團嘅青睞，仲促成其他合作機會。 3. 著重改變和教育，履行社會責任 ARTA想通過藝術設計履行社會責任，將環保同社會共融嘅理念融入喺設計項目裡面。就好似舊年喺東岸公園，佢哋以環保塑膠製成一個呈波浪形狀的天幕（「流動維港」），希望令市民意識到氣候變化同環保嘅逼切性，引起遊人對環保議題嘅關注。佢哋亦都喺作品附近設置一個小小告示牌，提醒市民香港嘅塑膠問題嚴重。呢啲作品都可以聯繫不同階層的人，宣揚永續發展意識。 實踐永續絕對唔係大企業嘅專利，中小企同初創一樣可以發揮佢地既優勢出一力。想知道ARTA更多嘅永續營商策略同措施，就撳入下面嘅連結，閱讀完整版嘅《企業實踐案例》啦！ 傳送門 https://ccsg.hku.hk/....../%e5%87%9d%e6%85%8b%e5%bb....../ 圖片來源﹕ARTA Architects